E vakavotukana na nodrau gagadre na vei­watini ni rawa mai ni tara rawa na nodra­tou vale ena ilavo ni volitaki sila.

Oqo na veika e vakaraitaka o Ana Vitau na marama ni Nakavika mai Namosi, ka vakawati ki Narata mai Nadroga.

E sa yabaki 35 ko Ana, e va na luvena ka sa tolu na yabaki na nodrau dau volitaki sila tiko mai kei turaga na watina ena makete levu Suva.

E vakaraitaka ni dau yadra vaka mataka lailai me vodo mai e na keria me mai volitaka na nona ivoli e Suva.

E dau volivolitaki e na loma ni tolu na siga e na dua na macawa o ya mai na siga Lotulevu kina Vakarauwai.

Na isau ni sila e toka e na 50c, $1, $1.50 kei na $2 dua na vuana.

E kaya ko Ana mai na vula ko Okotova ni yaba­ki sa oti a rawata mai kina e $500 kina $700 e na loma ga ni tolu na siga nona volitaki sila.

Na ilavo e rawati mai o ya e dau maroroya e so na kena wase me veivuke kina matavuvale, ka vaka kina na vuli ni luvena me na kalasi rua e na yabaki oqo.

E vakamacalataka ni volitaki sila ga e volia rawa kina na nona iyaya ni vale, me vaka na ka­toniwaililiwa, dabe kina na nodratou walesi, ka voli talega kina e so na kau ni vale.

E na gauna e sa raica tiko kina ni toso vinaka na cakacaka oqo e dau volia tale mai e so na nona taga sila vei ira na dau teitei ka toka na kena i sau e na $30 dua na taga.

E vakamacalataka ko Ana ni kena tei na Sila e taura ga e tolu na vula me matua kina, ia e sa dua na ilavo vinakata e na rawa mai kina kevaka e da na qarava vakavinaka.

E dau vakagauna na kena tei na sila, ka taura talega e tolu na vula me matua kina.

E rawa ni tei mai na vula o Seviteba ka qai mai volitaki e na vula ko Janueri.

Tiko e so na dredre e dau sota kaya e na gauna ni volivolitaki me vaka ni so na gauna e dau toso vinaka sara na ivoli ka so na gauna e sega soti baleta ni volivoli e vakatau tiko vei ira na leweni­vanua.

Vakatataro: salaseini.guniyaga@fijisun.com.fj